وفاقی حکومت کا ایس سی او 2027 اجلاس کے لیے 30 بلٹ پروف گاڑیاں خریدنے کا فیصلہ

اسلام آباد - پاکستان کے اعلیٰ ترین اقتصادی فیصلہ ساز ادارے نے اسلام آباد میں 2027 میں ہونے والے شنگھائی تعاون تنظیم ایس سی او سربراہ اجلاس کی میزبانی کے لیے سیکیورٹی انتظامات کے تحت 30 بلٹ پروف گاڑیاں خریدنے کی منظوری دے دی ہے۔

ذرائع کے مطابق ان گاڑیوں کی خریداری پر مجموعی طور پر 6 ارب 60 کروڑ روپے کی لاگت آئے گی۔ گاڑیاں سربراہ اجلاس میں شریک غیر ملکی مہمانوں کی نقل و حرکت اور پروٹوکول کے لیے استعمال کی جائیں گی۔

وزارت خارجہ کے حکام کا کہنا ہے کہ پاکستان نے حال ہی میں بشکیک میں ہونے والے ایس سی او اجلاس میں تنظیم کی کونسل آف ہیڈ آف اسٹیٹ کی 2026-27 کی چیئرمین شپ سنبھالی تھی۔ اس کے تحت پاکستان 2027 میں اسلام آباد میں سربراہ اجلاس کی میزبانی کرے گا۔

ایس سی او دنیا کی بڑی علاقائی تنظیموں میں سے ایک ہے جس میں روس، چین، بھارت اور وسطی ایشیائی ممالک شامل ہیں۔ سربراہ اجلاس میں رکن ممالک کے سربراہان مملکت اور حکومت شریک ہوتے ہیں۔

حکام کے مطابق میزبانی کے انتظامات میں سیکیورٹی، پروٹوکول اور لاجسٹک امور شامل ہیں۔ بلٹ پروف گاڑیوں کی خریداری اسی سلسلے کا حصہ ہے۔

ویب ڈیسک