فلائٹ میں شراب پی کر ہنگامہ کرنے والے مسافر کو ڈکٹ ٹیپ سے باندھ دیا گیا

ویب ڈیسک: امریکہ میں امریکن ایئرلائنز کی ایک پرواز کے دوران نشے میں دھت مسافر نے ہنگامہ کھڑا کر دیا۔ عملے اور دیگر مسافروں نے مل کر اسے ڈکٹ ٹیپ اور زپ ٹائی سے سیٹ پر باندھ دیا۔ واقعے کے بعد طیارے کو ہنگامی لینڈنگ کرانی پڑی۔

تفصیلات کے مطابق یہ واقعہ 31 اگست کو دالاس سے نیو جرسی جانے والی امریکن ایئرلائنز کی پرواز 3025 میں پیش آیا۔ پرواز کے دوران ایک مسافر نے شراب پی کر بدتمیزی شروع کر دی۔

ذرائع کا کہنا ہے کہ مسافر نے پہلے نسل پرستانہ اور توہین آمیز زبان استعمال کی۔ اس کے بعد اس نے اپنے ساتھ بیٹھے مسافر پر حملہ کر دیا اور ایک خاتون مسافر کو دھکا بھی دیا۔ صورتحال بگڑتی دیکھ کر کیبن کریو نے فوری کارروائی کی۔

عملے کے ارکان نے 3 دیگر مسافروں کی مدد سے مشتعل مسافر کو قابو کیا اور اسے ڈکٹ ٹیپ اور زپ ٹائی کے ذریعے سیٹ سے باندھ دیا۔

حالات قابو سے باہر ہونے پر پائلٹ نے بالٹیمور واشنگٹن انٹرنیشنل تھرگڈ مارشل ایئرپورٹ پر ہنگامی لینڈنگ کا فیصلہ کیا۔ لینڈنگ کے بعد طیارے پر موجود پولیس اہلکاروں نے مسافر کو حراست میں لے لیا۔

فیڈرل ایوی ایشن ایڈمنسٹریشن FAA نے اپنے بیان میں تصدیق کی ہے کہ مسافر نشے کی حالت میں تھا اور اس نے فلائٹ میں بدتمیزی کی۔ FAA نے مزید کہا کہ اس طرح کے واقعات میں ملوث افراد کے خلاف سخت کارروائی کی جائے گی۔