محسن رضائی کا امریکا کو واضح پیغام، شرائط پوری نہ ہوئیں تو آبنائے ہرمز نہیں کھلے گی

ایران کی قومی سلامتی کونسل کے سیکریٹری محسن رضائی نے امریکا کو واضح پیغام دیتے ہوئے کہا ہے کہ ایران کی شرائط پوری ہونے تک آبنائے ہرمز نہیں کھلے گی اور مذاکرات بھی نہیں ہوں گے۔

محسن رضائی نے ایرانی سرکاری ٹی وی کو دیے گئے بیان میں کہا کہ ایران کی سات شرائط تحریری شکل میں تیار کرکے پاکستان اور قطر کے ذریعے دوسرے فریق تک پہنچائی گئی ہیں۔ ان کے مطابق ایران کی جانب سے کوئی نئی شرط سامنے نہیں آئی بلکہ پہلے سے طے شدہ مؤقف کو سفارتی ذرائع کے ذریعے پہنچایا گیا ہے۔

رضائی نے آبنائے ہرمز کو ایران کے حقوق کے حصول کے لیے ایک اہم ذریعہ قرار دیتے ہوئے کہا کہ جب تک ایران کی شرائط پر عمل درآمد نہیں ہوتا، آبنائے ہرمز کو دوبارہ کھولنے اور مذاکرات شروع کرنے کا معاملہ آگے نہیں بڑھے گا۔

ایرانی عہدیدار نے خطے کے ممالک کو بھی خبردار کیا کہ وہ ایرانی پروازوں پر امریکی پابندیوں میں شامل نہ ہوں۔ ان کے مطابق اگر ایرانی طیاروں کو خطے کے ہوائی اڈوں کے استعمال سے روکا گیا تو اس کے اثرات علاقائی فضائی رابطوں پر بھی پڑ سکتے ہیں۔

محسن رضائی نے اس بیان میں ایران کی نئی سفارتی حکمت عملی کا بھی ذکر کیا اور کہا کہ تہران اپنے مؤقف میں تبدیلی کیے بغیر سفارت کاری کے نئے راستے تلاش کر رہا ہے۔