یمن کا تعز شہر حوثیوں کے محاصرے میں، خوراک، ایندھن اور ادویات کی شدید قلت

یمن کے تیسرے بڑے شہر تعز میں حوثی باغیوں کی پیش قدمی اور اہم رسدی راستوں کی بندش کے باعث شہر کا محاصرہ مزید سخت ہو گیا ہے، جس سے دس لاکھ سے زائد آبادی کو خوراک، ایندھن اور طبی سامان کی قلت کا سامنا ہے۔

ایسوسی ایٹڈ پریس کے مطابق، حوثیوں نے 4 اکتوبر کو تعز کے قریب اہم قصبے تربہ پر قبضہ کر لیا تھا، جس کے بعد شہر کا حکومت کے زیرِ کنٹرول علاقوں سے رابطہ بڑی حد تک منقطع ہو گیا۔ اہم راستوں کی بندش سے اشیائے ضروریہ کی ترسیل متاثر ہوئی ہے اور شہریوں میں مزید قلت کا خدشہ بڑھ گیا ہے۔

رپورٹ کے مطابق، ایندھن اور خوراک کی کمی کے باعث قیمتوں میں اضافہ ہو رہا ہے، جبکہ بعض خاندان شہر چھوڑ کر محفوظ مقامات کی طرف منتقل ہو رہے ہیں۔ امدادی سرگرمیوں کو بھی راستوں کی بندش اور وسائل کی کمی کے باعث مشکلات کا سامنا ہے۔ یمنی حکومتی فورسز حوثیوں کی پیش قدمی روکنے اور رسدی راستے دوبارہ کھولنے کی کوشش کر رہی ہیں۔