امریکہ کا چینی شپنگ کمپنی پر جاسوسی کا الزام جہازوں میں چھپے ہوئے آلات لگے ہوئے ہیں

واشنگٹن: دنیا کی سب سے بڑی ریاستی شپنگ کمپنیوں میں سے ایک چین کی COSCO پر ٹرمپ انتظامیہ کے دو سینئر اہلکاروں نے سنگین الزام عائد کیا ہے۔ رائٹرز کے مطابق اہلکاروں کا کہنا ہے کہ COSCO اپنے جہازوں پر نصب چھپے ہوئے آلات کے ذریعے ہدف ممالک خصوصاً امریکہ کے ساحلوں کے قریب فوجی مواصلات کی نگرانی اور جاسوسی کر رہی ہے۔

اہلکاروں کے مطابق COSCO کا بیجنگ کے ساتھ دہائیوں پر محیط انٹیلیجنس تعاون موجود ہے جس کے تحت چین یورپ، شمالی امریکہ اور ایشیا میں کام کرنے والے جہازوں اور طیاروں کے مواصلاتی سگنل جمع کر رہا ہے۔ اس کا مقصد فوجی مواصلاتی ٹیکنالوجی اور انکرپشن کے نظام کو بہتر بنانا ہے۔ اس کے علاوہ چین اہم شپنگ لینز اور سمندری راستوں کی نقل و حرکت پر بھی نظر رکھے ہوئے ہے۔ پینٹاگون نے جنوری 2025 میں COSCO کو ان کمپنیوں کی فہرست میں شامل کیا تھا جو چینی فوج سے منسلک ہیں۔

دوسری جانب واشنگٹن میں چینی سفارتخانے کے ترجمان Liu Chang نے ان الزامات کو "بے بنیاد" قرار دیتے ہوئے مسترد کر دیا۔ ان کا کہنا تھا کہ چین بیرون ملک ڈیٹا اکٹھا کرنے کے لیے کسی کمپنی کو ہدایت نہیں دیتا۔ COSCO نے بھی ابھی تک تبصرے کی درخواست کا جواب نہیں دیا۔ ماہرین کا کہنا ہے کہ COSCO کو امریکی سپلائی چین سے نکالنا امریکی تجارتی نیٹ ورک کے لیے بہت بڑا دھچکا ہوگا کیونکہ یہ کمپنی اب بھی امریکہ کی بندرگاہوں پر کام کرنے والی بڑی شپنگ کمپنیوں میں شامل ہے۔