ایران کا یو اے ای اور اردن میں امریکی فوجی تنصیبات پر ڈرون حملہ

*دبئی:* متحدہ عرب امارات نے ایران کی جانب سے اپنے علاقے پر کیے گئے ڈرون حملے کو "خطرناک کشیدگی" قرار دیتے ہوئے شدید مذمت کی ہے۔ یو اے ای کی سرکاری خبر ایجنسی WAM کے مطابق ایرانی ڈرون کو فضائی دفاعی نظام نے ملک کے علاقائی پانیوں میں ہی ناکارہ بنا دیا۔

یو اے ای کی وزارت خارجہ نے کہا کہ ایران کی یہ کارروائی ملک کی خودمختاری، سلامتی اور استحکام کی صریح خلاف ورزی ہے اور یہ شہریوں اور رہائشیوں کی سلامتی کے لیے براہ راست خطرہ ہے۔ وزارت نے اسے بین الاقوامی قانون اور اقوام متحدہ کے چارٹر کی خلاف ورزی قرار دیا۔

بیان میں یو اے ای نے واضح کیا کہ وہ اپنی خودمختاری، قومی سلامتی اور علاقائی سالمیت کے تحفظ کے لیے تمام اقدامات کا حق محفوظ رکھتا ہے۔ وزارت نے حملوں کو فوری طور پر روکنے اور تمام دشمنیوں کے خاتمے پر عملدرآمد یقینی بنانے پر زور دیا۔ یو اے ای نے ان حملوں کی مکمل ذمہ داری ایران پر عائد کی ہے۔

اس موقع پر خلیجی تعاون کونسل GCC کے سیکرٹری جنرل جاسم محمد البدیوی نے بھی ایران کے حملے کی شدید مذمت کی۔ انہوں نے کہا کہ ڈرون حملہ یو اے ای کی خودمختاری اور سلامتی کی خلاف ورزی ہے اور جی سی سی ممالک یو اے ای کے ساتھ متحد کھڑے ہیں۔ 

کویت کی وزارت خارجہ نے بھی ایک بیان میں یو اے ای سے مکمل یکجہتی کا اظہار کرتے ہوئے کہا کہ وہ یو اے ای کی سلامتی اور علاقائی سالمیت کے تحفظ کے لیے کیے جانے والے تمام اقدامات کی حمایت کرتا ہے۔

یو اے ای نے ایران کے اردن پر کیے گئے حملے کی بھی مذمت کی اور اسے ملک کی خودمختاری کی خلاف ورزی اور سلامتی و استحکام کے لیے خطرہ قرار دیا۔