لاس اینجلس میں بڑا فضائی حادثہ، لائیو کوریج کے دوران نیوز ہیلی کاپٹر تباہ، خاتون رپورٹر اور پائلٹ سمیت 3 افراد ہلاک

امریکہ کے شہر لاس اینجلس کے علاقے چیٹس ورتھ میں افسوسناک فضائی حادثہ پیش آیا ہے جہاں ایک نیوز ہیلی کاپٹر براہ راست کوریج کے دوران گر کر تباہ ہوگیا۔

غیر ملکی میڈیا کے مطابق یہ ہیلی کاپٹر این بی سی 4 اور ٹیلی منڈو 52 کا تھا جو 118 فری وے پر ایک بس اور گاڑی کے درمیان تصادم کی لائیو کوریج کر رہا تھا۔ اس دوران ہیلی کاپٹر اچانک توازن کھو بیٹھا اور زمین پر گرنے کے بعد اس میں شدید آگ بھڑک اٹھی۔

حادثے کے نتیجے میں ہیلی کاپٹر میں سوار خاتون رپورٹر الیانا مورینو اور تجربہ کار پائلٹ جارج مارسینیو موقع پر ہی ہلاک ہوگئے، جبکہ زمین پر موجود ایک شہری بھی اس کی زد میں آکر جان کی بازی ہار گیا۔

سامنے آنے والی آخری ویڈیو میں ہیلی کاپٹر کے اندر خطرے کا الارم واضح طور پر سنا جاسکتا ہے۔ ماہرین کے مطابق یہ الارم انجن کی طاقت ختم ہونے کا تھا، جس کے بعد پائلٹ کے پاس ہیلی کاپٹر کو سنبھالنے کا وقت نہیں رہا۔