ناروے کے وزیراعظم کا بڑا انکشاف: یوکرینی صدر زیلنسکی کا طیارہ ڈرون حملے سے محفوظ رہا

ناروے کے وزیراعظم جوناس گیر اسٹوئیر نے ایک بڑا انکشاف کرتے ہوئے کہا ہے کہ یوکرین کے صدر ولادیمیر زیلنسکی کا طیارہ منگل کے روز اوسلو جاتے ہوئے ایک جنگی ڈرون کے قریب سے گزرا۔

غیر ملکی خبر ایجنسی کے مطابق وزیراعظم اسٹوئیر نے کہا کہ یہ واقعہ اس وقت پیش آیا جب صدر زیلنسکی سرکاری دورے پر ناروے کے دارالحکومت اوسلو پہنچ رہے تھے۔ ان کے مطابق طیارے کو کوئی نقصان نہیں پہنچا اور صدر زیلنسکی محفوظ رہے۔

ناروے کے وزیراعظم نے اس واقعے کو "سنگین خطرات" قرار دیا اور کہا کہ یوکرینی صدر کو مسلسل اس طرح کے خطرات کا سامنا ہے۔ انہوں نے مزید کہا کہ جنگ کے دوران رہنماؤں کی سیکیورٹی ایک بڑا چیلنج بن چکی ہے۔

واضح رہے کہ روس اور یوکرین کے درمیان جنگ گزشتہ کئی ماہ سے جاری ہے اور اس دوران متعدد بار یوکرینی قیادت کو نشانہ بنانے کی کوششوں کی خبریں سامنے آ چکی ہیں۔ تاہم ناروے کی جانب سے اس نوعیت کا انکشاف پہلی بار کیا گیا ہے۔