سعودی عرب نے حوثی حملوں کے بعد ایسٹ ویسٹ آئل پائپ لائن عارضی طور پر بند کر دی

ریاض: سعودی عرب کی اہم ایسٹ ویسٹ آئل پائپ لائن پر ڈرون حملوں کے بعد بڑی پیش رفت سامنے آئی ہے۔

ابتدائی رپورٹس میں کہا گیا تھا کہ عراق سے آئے ڈرونز نے پمپنگ اسٹیشنز کو نشانہ بنایا جس کے نتیجے میں شدید آگ بھڑک اٹھی۔ یہی پائپ لائن سعودی تیل کو آبنائے ہرمز کو بائی پاس کر کے دنیا کی منڈیوں تک پہنچاتی ہے۔

دوسری جانب سعودی وزارتِ توانائی نے حملوں کی تصدیق کر دی ہے۔ وزارت کے مطابق ایران کی حمایت یافتہ حوثیوں نے ریاض اور مدینہ کے علاقوں میں واقع پمپنگ اسٹیشنز کو نشانہ بنایا۔ آتشزدگی کے باعث پائپ لائن کو احتیاطاً عارضی طور پر بند کر دیا گیا ہے۔ حملوں میں متعدد افراد زخمی بھی ہوئے جنہیں طبی امداد فراہم کی گئی ہے۔

سعودی وزارت نے مزید بتایا کہ حوثیوں نے ابھا، خمیس مشیط، جازان اور نجران سمیت جنوبی علاقوں کو بھی نشانہ بنانے کی کوشش کی۔

ماہرین کا کہنا ہے کہ پائپ لائن کی بندش سے عالمی منڈی میں خام تیل کی قیمتوں پر اثر پڑ سکتا ہے جس کے اثرات پاکستان میں پیٹرول کی قیمت پر بھی مرتب ہوں گے۔

نوٹ: یہ خبر بین الاقوامی میڈیا رپورٹس اور مانیٹرنگ ڈیسک کی معلومات پر مبنی ہے۔